Nar this forsaid iyle on the west syde of it layes Ila, ane ile of twentie myle lenthe from the north to the south, and sixteen myle in breadth from the eist to the west, fertill, fruitfull, and full of natural grassing, with maney grate Diere, maney woods, faire games of hunting beside everey toune, with ane watter callit Laxay, wherupon maney salmon are slaine, with ane salt water Loch, callit Lochegunord, quherin runs the water of Gyinord, with high sandey bankes, upon the quhilk bankes upon the sea lyes infinit Selccheis, whilkis are slayne with doges learnt to the same effect. In Ila is meikle lead ure in Moychills. In this iyle there is ane guid raid for schipps, callit in Erische Polmoir, and in English the Mechell-puill, this layes at ane toune callit Lanlay Vanych, ane uther raid layes within Ellan Grynard, callit in English the isle at the poynt of the nesse, the raid is callit Leodannis. Within this iyle ther is sundrie-freshe water Lochis, sic as Lochmoyburge wherin ther layes ane iyle perteining to the Bishopes of the Isles. The loch of Ellan Charrin, quherin ther is ane iyle pertyning to M’Gillane of Doward. Loch Cherossa with ane iyle perteining to the Abbot of Colmkill. In this iyle there is strenths castells, the first is callit Dunowaik the biggest on ane Craig at the sea side, on the southeist pairt of the countery pertaining to the Clandonald of Kintyre; second is callit the castle of Lochgurne, quhilk is biggit in ane iyle within the said fresche water Loche far fra land, pertaining of auld to the Clandonald of Kintyre, now usurped be M’Gillayne of Doward. Ellan Forlagan in the midle of Ila, ane faire iyle in fresche water.
— Description of the Western Isles of Scotland, called Hybrides; by Mr Donald Monro High Dean of the Isles who travelled through the most of them in the year 1549.