Wee Willie Winkie rins through the toun
Upstairs an doonstairs in his nichtgoun
Rappin at the windaes, tirlin at the lock
Are aa the bairnies in their beds, it’s past echt o clock?
There are bairnies sleepin here that niver waukened up
Niver saw a simmer’s day, or got the birthin cup
Niver watched the sun rise, or gowans dauncin bricht
There are bairnies sleepin in the Lang Guid Nicht
Yet their mithers murn them, their faither’s ne’er forget
The shadda-faimly littlins ahin Life’s steekit yett
May their sleep be blithesome, wi bonnie flooerie dreams
Aa the bairnies sleepin unner Daith’s cauld steens.
Sheena Blackhall, Cleaning the Apostle Spoons: Poems in Scots & English, Aberdeen: Malfranteaux, 2012.