Haile, Quene and Emperyse!

William Dyce, The Virgin and Child, 1845.
William Dyce, The Virgin and Child, 1845.

ROISS MARY MOST OF VERTEW VIRGIN ALL.

ROISS Mary most of vertew virginall.
Fresche flowr on quhom the hevynnis dewe doun fell.
O gemme joynit in joye angelicall,
In quhom Jhesu rejosit wes to dwell.
Rute of refute, of mercy spring and well,
Of ladyis chois as is of letteris A,
Empress of hevyne, of paradyss, and hell,
O mater Jhesu, salue Maria!

O sterne that blyndis Phebus bemys bricht,
With course above the hevynnis cristallyne;
Above the speir of Saturne hie on hicht,
Surmunting all the angelis ordouris nyne;
O lamp lemand befoir the trone devyne!
Quhar cherubyne syngis sweit Osanna,
With organe, tympane, harpe, and symbilyne;
O mater Jhesu, salue Maria!

O chast conclaif of clene virginite,
That closit Crist but crymes criminale;
Tryumphand tempill of the Trinite,
That turned us fra Tartar eternall:
Princes of peiss, and palme imperiall,
Our wicht invinsable Sampson sprang the fra,
That with ane buffat bair doune Beliall;
O mater Jhesu, salue Maria!

Thy blyssit sydis bair the campioun,
The quhilk, with mony bludy woundis, in stour,
Victoriusly discomfeit the dragoun
That reddy wes his pepill to devour;
At hellis ȝettis he gaf hyme na succour,
He brak the barmekyn of that bribour bla,
Quhill all the feyndis trymbillit for reddour:
O mater Jhesu, salue Maria!

O madyne meik, most mediatrix for man,
And moder myld, full of humilite!
Pray thy sone Jhesu, with his woundis wan,
Quhilk deinȝeit him for our trespass to de,
And as he bled his blude vpon a tre,
Us to defend fra Lucifer our fa,
In hevyne that we may syng apon our kne:
O mater Jhesu, salue Maria!

Hail, purifyet perle! Haile, port of paradyse
Haile, redolent ruby, riche and radyuss!
Haile, clarifyit cristale! Haile, quene and emperyse!
Haile, moder of God! Haile, Virgin glorius!
O gracia plena, tecum Dominus!
With Gabriell that we may syng and say,
Benedicta tu in mulieribus: O mater Jhesu, salue Maria!

— Asloan Manuscript, National Library of Scotland.

Author: Christian Clay Columba Campbell

Christian Clay Columba Campbell is a Roman Catholic of the Anglican Use. As Senior Warden of the Cathedral of the Incarnation (Orlando, FL), he organised the process by which the parish accepted the Apostolic Constitution Anglicanorum coetibus, petitioning to join the Catholic Church. The Anglican Cathedral is now the Church of the Incarnation in the Personal Ordinariate of the Chair of St. Peter. Personal queries should be directed to me at eccentricbliss dot com.

Leave a Reply

This site uses Akismet to reduce spam. Learn how your comment data is processed.